Disa kohë më parë mora një gjobë për një shkelje trafiku. Polici rrugor më shpjegoi se shkelja do të mbetej në historikun e patentës time, por më pas më tha se shteti i Illinois kishte bërë të mundur një mënyrë për të hequr këtë lloj shkelje. “Ti mund të bësh kursin”, tha ai. “Dhe do të jetë sikur kjo të mos ketë ndodhur kurrë”.
Tani mendo për mënyrën se si funksionon ky sistem. Ne mund të imagjinojmë që një ditë një administrator mjaft i lodhur dhe me përtesë është duke parë një listë të gjatë të të gjithë personave me mbiemrin Smith, të cilët ngasin makinën në Illinois, me qëllim që të gjejë atë të mjerin që ka marrë një gjobë për shkelje.
Pastaj, disa javë më vonë, një administrator tjetër bën të njëjtën punë të mundimshme, dhe kërkon në të njëjtën listë me qëllim që të fshijë nga sistemi shkeljen në fjalë. Procesi është i ligjshëm, por është diçka shumë jo-personale. Asnjë marrëdhënie nuk përfshihet.
Është një e vërtetë e mrekullueshme që Jezusi vdiq për të fshirë listën e mëkateve tona të regjistruara. Por nëse kjo është gjithçka që kuptojmë, dashuria jonë për Perëndinë do të jetë po aq e dobët sa dashuria që kam për punonjësin që fshiu shkeljen në emrin tim. Krishti vdiq jo vetëm për të pastruar listën tënde të mëkateve, por edhe për të të sjellë në një marrëdhënie dashurie me Perëndinë. Shpëtimi nuk është një transaksion i zgjatur, i kryer nga një administrator i panjohur qiellor. Është Perëndia që synon të krijojë një bashkim intim me ty.
Të Bashkuar me Krishtin
Kur ti vjen në besim tek Jezusi, Fryma e Shenjtë bën një lidhje midis vdekjes dhe ringjalljes së Jezusit, dhe jetës tënde sot. “Sepse, nëse jemi bërë një me Krishtin në një vdekje të njëjtë me të tijën, do të jemi një edhe në ringjalljen e tij” (Romakëve 6:5).
Çfarë do të thotë të jesh “i bashkuar” me Jezu Krishtin në vdekjen dhe ringjalljen e Tij?
Më duket e dobishme ta mendoj në këtë mënyrë: Disa gjëra kanë qenë dikur të vërteta për ty—ti ke qenë nën sundimin e mëkatit, ti ishe i ndarë nga Perëndia, dhe ishe i pafuqishëm për të bërë ndonjë gjë në lidhje me këtë (Romakëve 5:21; Efesianëve 2:12; 2:1).
Nëse do të kishe qëndruar në atë gjendje, do të kishe përfunduar nën dënim. Por kur besove në Jezusin, ai person ndaloi së ekzistuari (Romakëve 8:1). Ai ose ajo vdiq me Jezusin në kryq. Kjo është ajo që Pali nënkupton kur thotë, ne “vdiqëm me Krishtin” (Romakëve 6:8). Por nuk mbaron këtu. Pali gjithashtu shkroi për ne se, “nëse jemi bërë një me Krishtin në një vdekje të njëjtë me të tijën, do të jemi një edhe në ringjalljen e tij,” (Romakëve 6:5).
Kur Fryma e Shenjtë krijoi një lidhje të thellë në Krishtin, Ai solli një person të ri në ekzistencë. Tani je nën mbretërinë e hirit, ti je një fëmijë i Perëndisë dhe fati yt është jeta e përjetshme (Romakëve 5:21; Galatasve 4:4-7; Romakëve 6:22-23). Ti ende dështon në shumë mënyra, por pavarësisht se sa shpesh dështon, nuk mund t’i kthehesh kurrë personit që ke qenë dikur. Ai person ka vdekur dhe është zhdukur përgjithmonë. Ai ose ajo ka pushuar së ekzistuari.
Bashkimi me Krishtin është shumë më tepër sesa të bësh një ndryshim të ri ose të marrësh një vendim; është jeta e Krishtit që rrjedh në ty me fuqinë e Frymës së Shenjtë. Jezusi foli për këtë bashkim kur Ai tha, “Unë jam hardhia, ju jeni shermendet” (Gjoni 15:5). Ashtu si lëngësira del nga hardhia dhe rrjedh drejt degëve, kështu edhe jeta e Krishtit do të rrjedhë nga Ai drejt popullit të Tij. Kjo është shumë më tepër se një proces ligjor sipas të cilit mëkatet e tua janë falur dhe pashaporta jote është vulosur për hyrje në parajsë. Kjo është jeta e Perëndisë që po hyn në ty. Është e vështirë të imagjinosh një imazh më intim.
Kur Fryma e Shenjtë na bashkon me Krishtin, Ai pushton jetën tonë me dashurinë e Tij. Një martesë e mirë është edhe e ligjshme, dhe ka edhe një marrëdhënie midis burrit dhe gruas. Është një marrëveshje e përhershme dhe një bashkim intim. Ajo promovon siguri dhe dashuri të thellë. Perëndia dëshiron të na sjellë në një marrëdhënie dashurie që është edhe e sigurt dhe intime. Është e sigurt, sepse Perëndia bën një besëlidhje me ne, dhe është intime sepse përfshin bashkimin me Jezus Krishtin.
I Bekuar në Krishtin
Merr në konsideratë ndryshimin midis një palë çorapeve dhe një palë pantallonave. Ti e di çfarë ndodh kur fut çorapet në lavatriçe, apo jo? Njëra prej tyre humbet. Problemi, sigurisht, është se ato nuk i mban asgjë të bashkuara njëra me tjetrën. Pantallonat janë ndryshe. Nuk kam dëgjuar kurrë që pantallonat të dalin nga lavatriçja me një këmbë që u mungon.
Perëndia nuk i hedh bekimet nga qielli si çorapet: “A do të dëshironte ndonjëri falje? Ka ndonjë që do jetë të përjetshme?” Perëndia na jep një bekim, Jezus Krishtin. Ai “na bekoi me çdo bekim frymëror në vendet qiellore, në Krishtin” (Efesianëve 1:3). Të gjitha bekimet e Perëndisë na vijnë nëpërmjet Jezusit, dhe asnjë prej tyre nuk na vjen e ndarë nga Ai. Falja gjendet tek Jezusi, jeta e përjetshme gjendet tek Jezusi, shenjtëria gjendet tek Jezusi, dhe fitorja mbi mëkatin gjendet tek Jezusi. Zoti e ka bërë Jezusin për ne “urtësi…drejtësi, shenjtërim dhe shpengim” (1 Korintasve 1:30). Këto dhurata bashkohen të gjitha, të pandara nga Ai, dhe nëse ti je në Krishtin, të gjitha këto bekime bëhen të tuat.
I Çliruar nga Krishti
Të jesh në Krishtin, të pajis ty për betejën tënde kundër mëkatit. Dikur ti ishe i destinuar për të dështuar në këtë betejë, por tani, në Krishtin, ti je i pozicionuar për fitore. “Sepse mëkati nuk do të zotërojë më mbi ju, sepse nuk jeni nën ligj, por nën hir” (Romakëve 6:14).
Imagjinoje veten në një fushë beteje. Skuadra jote po bombardohet nga të gjitha anët, dhe ti ziesh rob. Ti i dorëzon të gjitha armët, dhe të çojnë aty ku duket si një kafaz i madh. Personi që komandon kafazin duket i llahtarshëm. Kur ai jep urdhëra, njerëzit brenda i binden menjëherë. Ti e vlerëson jetën tënde, ndaj vendos të bësh të njëjtën gjë.
Për një vit të tërë e gjithë jeta jote jetohet në këtë kafaz. Ti fle, ushqehesh, dhe stërvitesh, por gjatë gjithë kohës je nën fuqinë e armikut tënd, dhe përsa kohë që je në këtë kafaz, nuk ka asgjë që ti mund të bësh për këtë. Por një natë, ti dëgjon zhurmën e një makine dhe të shtëna armësh. Komandanti yt ka ardhur me të gjitha forcat e tij të të çlirojë. Ndërsa ti hipën në makinën ushtarake, ai të jep një armë: “Merre këtë,” të thotë, “ti je prapë në betejë tani.”
Ditën tjetër ai që drejtonte kafazin, vjen dhe të kërkon. Ai jep urdhëra, por ti nuk je më i detyruar të bësh atë që ai thotë. Ti nuk je më në kafaz; ti je i lirë. Kur ti je në Krishtin, ti je në një pozitë krejt të re. Ti je i lirë, dhe kjo do të thotë që ti je në pozicion për të luftuar. Mëkati gjithmonë do të jetë armiku yt, por ai nuk të komandon më.
“Le të mos mbretërojë, pra, mëkati në trupin tuaj të vdekshëm, që t’i bindeni atij në epshet e veta…por paraqisni veten tuaj Perëndisë, si të gjallë prej së vdekurish, dhe gjymtyrët tuaja si mjete drejtësie për Perëndinë” (Romakëve 6:12-13).
I Sigurt në Krishtin
Besimi të vë në Krishtin, ku je plotësisht i sigurt—edhe kur je plot frikë.
Një miku im më tregoi historinë e herës së tij të parë kur udhëtoi me një avion. Kur hipi në avion ai ishte në sediljen e mesme prej tre vëndesh. Pranë dritares ishte një zonjë e moshuar që dukej vërtet e nervozuar. Në vendin tjetër, ishte një biznesmen i cili dukej sikur e kishte bërë këtë një mijë herë më parë. Shoku im, i cili ishte në mes, ishte gati për udhëtim, por duke qenë se nuk kishte fluturuar kurrë më parë, ai ishte pak i tensionuar.
Kur avioni u ngrit, biznesmeni hapi gazetën. Miku im u mbajt në krahët e vendit të tij. Zonja e vjetër, zgjati dorën të merrte qesen e emergjencës sepse kishte përzierje. Kur dreka u shërbye, biznesmeni e hëngri të gjithë, shoku im hëngri vetëm gjysmën e vaktit, ndërsa zonja e moshuar thjesht i hodhi një sy të sajës dhe as nuk e preku.
Këtu është konkluzioni i historisë: të tre këta pasagjerë mbërritën në të njëjtin vend në të njëjtën kohë! Ata patën një përvojë shumë të ndryshme të udhëtimit, por të gjithë ishin të sigurt në të njëjtën mënyrë. Siguria jote e përjetshme nuk varet nga fakti se sa mirë e përjeton jetën e Krishterë; por nga fakti që ti je në Krishtin.
Një Shteg i Hapur
Një i Krishterë është një person, i cili është bashkuar me Krishtin në vdekjen dhe ringjalljen e Tij. Kur ti u bashkove me Krishtin nëpërmjet besimit, personi që ti ke qenë më parë pushoi së ekzistuari, dhe një person i ri erdhi në ekzistencë. Ti akoma ke shumë beteja për të luftuar, dhe do të dështosh në shumë mënyra, por duke qënë se Krishti të ka çliruar, ti je në një pozicion krejt të ri.
Të zbulosh pozicionin tënd të ri në Krishtin është një nga faktorët më të rëndësishëm për të jetuar një jetë të Krishterë. Mëkati gjithmonë do jetë armiku yt, por ai nuk të komandon më. Ti tani je në një pozitë ku mund të luftosh.
