Ringjallur

Kur gratë mbërritën, ato zbuluan se guri përpara varrit ishte zhvendosur, dhe duke hyrë brenda ato zbuluan me habi të madhe se varri ishte bosh. Kushtoi vëmendje faktit se gratë nuk arritën në përfundimin që Jezusi ishte ringjallur prej së vdekurish. Ato u larguan nga varri “të hutuara”, dhe ishin totalisht të pështjelluara për të pasur një shpjegim (Luka 24:4).  

Nuk ishte se Maria pasi zbuloi se trupi ishte zhdukur tha, “Unë kam një parandjenjë që Jezusi duhet të jetë ringjallur prej së vdekurish,” dhe Joana u përgjigj, “Mendoj që ke të drejtë. Edhe unë e kam atë parandjenjë. ” Ky mendim as që u shkoi ndër mend atyre. Kështu që, nga e dinin ato se Jezusi ishte ringjallur? Perëndia ua tregoi atyre. 

Perëndia Jep Shpjegimin 

“Dhe ndodhi që, ndërsa ishin shumë të hutuara nga kjo, ja, dy burra të veshur me rroba të ndritshme iu qëndruan pranë atyre. Dhe, mbasi ato, të trembura, e mbanin fytyrën të përkulur përdhe, ata u thanë: Ç’e kërkoni të gjallin midis të vdekurve? Ai nuk është këtu, por është ringjallur” (24:4-6).

Perëndia thirri dy engjëj dhe u tha: “Shkoni dhe u tregoni atyre se çfarë kam bërë. Këto gra e duan Birin Tim, por nuk ka asnjë mënyrë në botë që të mund të kuptojnë se çfarë ka ndodhur. Shkoni dhe u thoni atyre.” Besimi i krishterë qëndron në besimin e shpjegimit të Perëndisë për atë që Ai ka bërë. 

Si mund ta dinte Maria, nëna e Zotit tonë, çfarë po ndodhte kur u ngjiz? Perëndia e dha shpjegimin. Ishte e njëjta gjë me barinjtë. Si mund ta dinin ata, që foshnja në grazhd ishte Perëndia në trajtë njerëzore? Perëndia dërgoi engjëj për t’ia thënë atyre. Dhe ishte e njëjta gjë kur Jezusi u kryqëzua. Shumë njerëz e panë Atë të vdiste, por si mund ta kuptonin ata se çfarë po bënte Perëndia? Perëndia na tregon se, në kryq, Krishti mbajti mëkatin tonë dhe e dha jetën e Tij si një sakrificë për ne. 

Gratë kurrë nuk do ta kishin kuptuar pse varri ishte bosh. Perëndia u tha atyre se çfarë ndodhi. Besimi i krishterë nuk mbështetet tek ndjenjat, impulset, apo njohuritë personale. Por qëndron te shpjegimi i Perëndisë për ngjarjet e dhëna për ne në Shkrimet. Ai është ringjallur!  

“I Ringjallur” Do të Thotë se Vdekja është Mposhtur

Përgjatë historisë vdekja ka qenë si një tiran që ushtron një mbretërim terrori mbi racën njerëzore. Askush nuk mund t’i shpëtojë. Abrahami, Isaku, Jakobi, Moisiu, dhe Davidi të gjithë i besuan premtimit të Perëndisë, por vdekja mori secilin prej tyre. Herët ose vonë, vdekja na merr të gjithëve. Pyetja është, si të dalim prej kësaj? 

Kur isha në shkollë fillore, klasa jonë kishte një mi të bardhë që mund ta mbanim në shtëpi. Një herë miu u intrigua nga autobusi im i kuq dykatësh i stilit Londinez, dhe pasi nuhati përreth, u ngjit brenda. Kjo ishte jashtëzakonisht argëtuese—derisa miu arriti pjesën e përparme të autobusit. Atëherë patëm një problem. Miu nuk mund të lëvizte as përpara dhe nuk mund të kthehej as mbrapa. Kishte ngecur totalisht.

Mbaj mend babain tim që tha: “Ka vetëm një gjë për të bërë bir. Do na duhet të shkatërrojmë autobusin! ” Ai mori një thikë dhe preu pjesën e sipërme të autobuzit. Miu ishte i lirë. Nuk mund të imagjinosh se çfarë lehtësimi ishte. Por autobusi im nuk ishte kurrë më i njëjti. Ishte me të vërtetë një pamje e rrallë; një autobus i kuq tipik Londinez, me gjysmën e pjesës së sipërme që mungonte. Sigurisht, kjo i bëri gjërat edhe më interesante për miun. 

Më parë, autobusi kishte një rrugë për të hyrë por nuk kishte asnjë rrugëdalje. Tani, miu mund të hynte nga dera, të ngjitej shkallëve dhe të dilte nga pjesa e sipërme! 

Kur Jezus Krishti vdiq, ai hapi një vrimë në vetë vdekjen. Për njerëzit e Krishtit vdekja nuk është më një burg, por një kalim që të çon drejt e në praninë e Perëndisë. Ky është një ndryshim jashtëzakonisht i madh. I ringjallur do të thotë që i gjithë personi do të shpengohet: Mesazhi i Pashkëve nuk është që Jezusi është gjallë, por që Jezusi u ringjall! Ja vlen të mendosh për ndryshimin. 

“I Ringjallur” do të Thotë që i Gjithë Personi do të Shpengohet 

Të gjitha fetë kanë një farë ideje për mbijetesën pas vdekjes, por ringjallja e trupit është unike për krishterimin. Lajmi i mirë nuk është thjesht që Jezusi është gjallë, por që Jezusi është ringjallur (Luka 24: 6). Ja vlen të mendosh për ndryshimin. 

Biri i Perëndisë ishte gjallë në parajsë para se Ai të merrte trajtën njerëzore. Atëherë, pse Ai nuk e la thjesht trupin e Tij të kryqëzuar në varr dhe të kthehej tek Ati? Mbi të gjitha ishte thjesht mish dhe kocka. Pse u mundua ta bënte këtë? Engjëjt edhe mund të ishin shfaqur në mëngjesin e së Dielës së Pashkëve dhe të kishin thënë: “Trupi i tij është këtu në varr, por mos u shqetësoni, sepse Shpirti i Tij është me Atin në qiell”. Në fund të fundit a nuk është pikërisht kjo ajo që themi në një varrim kur një i Krishterë vdes? 

Mesazhi i Pashkëve është se Krishti u ringjall! Nuk ishte vetëm fryma e Jezusit që u çlirua nga vdekja—por ishte trupi i tij. Perëndia bashkoi trupin dhe shpirtin së bashku. Vdekja i ndan ato. Kjo është arsyeja pse vdekja është një armik kaq i tmerrshëm. Është shkatërrimi i natyrës tonë. Ringjallja na tregon se trupi ka rëndësi. Ti je një bashkim i mrekullueshëm i shpirtit dhe trupit, dhe Jezusi erdhi në botë jo për të shpëtuar një pjesë tënden, por për të të shpenguar ty në tërësi. Ai erdhi për të të sjellë ty, trup dhe shpirt, në gëzimin e një krijese të re. 

Vdekja ndan shpirtin tënd nga trupi yt, dhe kjo është arsyeja pse është një armik kaq i tmerrshëm. Është thyerja e asaj që Perëndia ka bashkuar, dhe do të mundet vetëm kur trupi dhe shpirti yt të ribashkohen në fuqinë e një jete të re. Gjëja e parë që duhet të dish për trupin e ringjallur, është se ai është një trup! Kur Krishti iu shfaq dishepujve, mendimi i tyre i parë ishte se ata po shihnin një fantazmë (24:37). 

Por Jezusi u tërhoqi vëmendjen tek trupi i Tij:  “Shikoni duart e mia dhe këmbët e mia, se jam unë vetë. Më prekni dhe shikoni, sepse një frymë nuk ka mish e eshtra, si po shihni se unë kam!” (24:39). Mish dhe eshtra! Ky është një trup i vërtetë!

Të Bësh një Udhëtim Virtual 

Supozo se ke planifikuar pushimet e një jete në Hawaii, por pak para se të nisesh për udhëtim, ti bie nga shkallët dhe thyen pothuajse çdo kockë në trupin tënd. 

Imagjinoje si në stilin e filmave vizatimorë për fëmijë; ti përfundon në spital i fashuar nga koka deri tek këmbët, dhe qëndron shtrirë me një termometër në gojë. Një mik, i cili është një mjeshtër në kompjuter, të ofron të bësh një udhëtim virtual. Ai rregullon laptopin e tij, dhe ti padyshim ke mundësi të shohësh pamje të mrekullueshme në Honolulu. “Është kaq e bukur, thjesht do të doja që të mund të shkoja”. “Por, ti sapo e bëre,” thotë miku yt. “Ti ishe atje në një udhëtim virtual”. 

Çfarëdo që të thotë ai, ti e di që për sa kohë që trupi yt është i bllokuar në spital, ti nuk ke qenë në Hawaii. Të shkosh atje në mendjen tënde, ose nëpërmjet internetit, thjesht nuk është e njëjta gjë. Jeta që Perëndia u premton njerëzve të Tij në parajsë nuk është si një udhëtim virtual. Nuk është një përvojë shpirtërore ose një lojë brenda mendjes. Perëndia e ka dërguar Krishtin të të shpengojë ty në tërësi, dhe të të marrë ty me trup dhe shpirt në praninë e Tij. Lajmi i mirë është që Krishti është ringjallur, dhe ringjallja e trupit është e ardhmja e lavdishme që qëndron përpara çdo besimtari të Krishterë.

Si do të Jetë Trupi i Ringjallur? 

Kur trupi i Jezusit u ngrit nga të vdekurit ai gjithashtu u ndryshua. Trupi i tij nuk i nënshtrohej më plakjes ose vdekjes. Natyra e tij njerëzore ishte shndërruar dhe përshtatur për përjetësinë. Kjo është arsyeja pse të Krishterët mund të presin me padurim parajsën. 

Shkrimet na japin katër përshkrime të trupit të ringjallur.

1. I Paprishshëm 

“Mbillet në prishje, ringjallet në paprishje” (2 Korintasve 15:42)

Llazari ishte ringjallur prej së vdekurish, por ai doli nga varri ashtu siç kishte hyrë në të. Ai vazhdoi procesin e plakjes në pikën ku e kishte lënë, dhe pastaj në një moment të dytë të gjorit iu desh të kalonte përsëri në të gjithë procesin e mjerueshëm të vdekjes. 

Por Jezusi u ngrit në fuqinë e një jete të pafund (Hebrenjve 7:16), dhe trupi yt i ringjallur, ashtu si i tij, do të jetë një trup që nuk do të vdesë kurrë. Trupi yt i ringjallur nuk do të plaket kurrë, nuk do të jetë i sëmurë, dhe nuk do të prishet kurrë.

2. I Lavdishëm

“Mbillet në çnderim, ringjallet në lavdi” (1 Korintasve 15:43).

Kur Pjetri, Jakobi, dhe Gjoni u ngjitën në mal me Jezusin, ata patën mundësinë të shihnin lavdinë e Tij të ardhshme (Marku 9: 2-8). Kishte një ndriçim dhe një shkëlqim rreth Tij. Dhe do të ketë një ndriçim, shkëlqim, dhe lavdi edhe mbi ty në trupin e ringjalljes, teksa pasqyron lavdinë e vetë Krishtit.

3. I Fuqishëm 

“Mbillet në dobësi, ringjallet në fuqi” (1 Korintasve 15:43).

Ti do të kesh më shumë energji, më shumë qëndrueshmëri, më shumë shpejtësi, koordinim më të mirë, dhe kapacitet më të madh në trupin tënd të ringjallur sesa ke pasur ndonjëherë më parë!

4. Frymëror

“Mbillet trup natyror, ringjallet trup frymëror” (1 Korintasve 15:44)

Një trup frymëror është ai që i përgjigjet plotësisht Frymës së Shenjtë. Ne nuk do të themi më, “fryma është e gatshme, por mishi është i dobët” (Mateu 26:41). Trupat tanë të ringjallur do të jenë po aq të etur për të bërë vullnetin e Perëndisë sa shpirtrat tanë të shpenguar. Ja çfarë duhet të presësh në parajsën e re dhe tokën e re: Një trup që është i përshtatshëm të jetojë përgjithmonë, dhe nuk do të degradohet në plakje kurrë. Një trup i lavdishëm dhe i fuqishëm. Një trup që i përgjigjet plotësisht Frymës së Shenjtë.  

Prit Derisa të Gjithë të Jenë Gati 

Dhurata e trupit të ringjallur është aq e mrekullueshme, sa që Perëndia e mban atë në rezervë deri në ditën kur Ai do të mbledhë të gjithë fëmijët e Tij së bashku. Të dashurit e krishterë që kanë vdekur janë me Jezusin, duke shijuar me vetëdije lavdinë e pranisë së Tij. Kjo është më mirë se gjithçka që ata mund të dinë këtu. Por Perëndia ka një dhuratë tjetër për ta dhe për ne; diçka që Ai po e ruan për ditën kur Ai do të mbledhë gjithë familjen e Tij së bashku. 

Kur Krishti të rikthehet, të dashurit tanë të Krishterë do të vijnë me Të (1 Thesalonikasve 4:14). Atëherë “të vdekurit në Krishtin do të ringjallen” (4:16) dhe shpirtrat e tyre do të bashkohen me trupat e ringjallur, të përshtatur për jetën e përjetshme. Në të njëjtën kohë, besimtarët që janë ende gjallë do të “do të rrëmbehemi njëkohësisht në retë me ata, për të dalë përpara Zotit në ajër” (4:17). Ne do të përjetojmë të njëjtin transformim nëpërmjet të cilit trupat tanë do bëhen të përshtatshëm për jetën e përjetshme. 

Një Shteg i Hapur

Ditën e tretë varri ishte bosh. Jezusi u ringjall prej së vdekurish. Ne e dimë këtë sepse Perëndia tha kështu. Kur Krishti të vijë përsëri me lavdi dhe të mbledhë të gjithë njerëzit e Tij, edhe neve do të na jepen trupa të ringjallur. Perëndia do të shpengojë jo vetëm një pjesë tënden, por ty në tërësi. Kur ta vendosësh këtë në mendjen tënde, do të kesh një pritshmëri shumë më të madhe të gëzimeve që qëndrojnë përpara.